ECOFIVE FISKAR VIÐ FÝRA RÆKJUTROLUM FRÁ VÓNINI

Nógv eygu í fiskivinnuni eru vend móti norska nýbygninginum Ecofive, sum er ímynd av nýhugsan í fiskivinnuni og longu hevur vunnið virðislønir. Í summar fer trolarin til rækjufiskiskap við útgerð frá Vónini.

Signalvirðið í sjálvum navninum á skipinum er greitt. Ecofive. Ein stytting fyri Eco-Friendly Fishing Vessel. 72 metrar langa skipið verður av mongum mett at vera ein ímynd av nýhugsan, bæði tá talan er um handfaring av fiski og atliti til umhvørvi. Í fjør vann Ecofive norska Innovatiónsprísin, har grundgevingin var slóðbrótandi tøknin, sum verður brúkt.

– Ecofive er ein visjón, sum nú gerst veruleiki. Ein visjón um at fiska meira burðardygt við at minka um orkunýtsluna, varðveita góðskuna á fiskinum og hartil gagnnýta fiskin 100 prosent, segði reiðarin Tore Roaldsnes, tá hann í august í fjør tók ímóti Innovatiónsprísinum vegna reiðaríið Bluewild.

Fiskurin kemur ongantíð á troldekkið, hann verður førdur livandi úr sjónum inn í vatntangar undir vatnskorpuni, haðani hann síðani verður førdur inn á verksmiðjuna og virkaður í einum jøvnum streymi. Málið er at betra um góðskuna á hvørjum einstøkum fiski, sum tí ikki skal kroystast í tungum trolposum á dekkinum. Og so er skipið bygt til at vera so orkusparandi sum tilber, eitt nú við hybrid tøkni, battarískipanum, serligum sniði á skrokkinum og tveimum skrúvum.

VÓNIN ER VIÐ

Vónin hevur samstarvað við Tore Roaldsnes síðani 2016, tá hann keypti rækjutrol til Langenes og Stornes. Seinni hevur Vónin eisini latið útgerð til Ishavet hjá reiðarínum. Í februar 2022 varð Vónin bjóðað til framløgu um Ecofive.

– Longu tá vóru Storm lemmar frá Vónini við á modellmyndunum, og síðani hava vit tosað saman um reiðskap til nýggja skipið, sigur Óli Horn, søluleiðari fyri botn- og rækjutrol hjá Vónini.

Ecofive skal fiska botnfisk og rækjur, og í rækjufiskiskapinum skal fiskast við fýra trolum í senn. Tað hevur Vónin ikki roynt áður.

– Tað er ein serlig uppgáva fyri okkum. Skipið kemur at fiska við tveimum settum av trollemmum, stórar uttast og smærri innanfyri, og so verður eitt rullilodd millum innastu trolini, sigur Óli Horn.

Tey fýra trolini eru 3200 meskar stór Vónin Novaja, hvørt trolið spreiðir umleið 70 metrar, og spílið millum uttastu lemmarnar verður umleið 320 metrar. Tað eru umleið 100 metrar meira, enn tá fiskað verður við trimum trolum, fiskiarealið er tí sera stórt. Partur av trolunum eru Fortis, sum er klænt og lætt dynema net, og rundan um ristirnar er sera stert, knútaleyst net. Og hartil skulu trolini gerast soleiðis, at posin kann loysast frá, áðrenn hann kemur upp á dekkið.

– Tað verður gjørt við at montera eitt stykki millum ristina og posan. Eitt slag av gaflum, sum kunnu knýtast í skipið. Og so skal ein lína knýtast í endan á posanum, so hann kann lyftast spakuliga upp, tá fiskurin skal førast inn í tangarnar undir vatnskorpuni, sigur Óli Horn.

EITT GÓÐSKUSTEMPUL

Ecofive hevur fingið nógva umrøðu, bæði í Norra og kring heimin annars, og nógv eygu fylgja við, nú nýbygningurin fer til fiskiskap.

– Tey hava álit á okkum, og tí veitir Vónin alla útgerðina til rækjufiskiskapin hjá hesum nýggja og dýra skipi. Og tað er longu farið at kasta av sær yvir á onnur skip, sum eru á veg, sigur Óli Horn.

Avtalan við Bluewild er, at útgerðin frá Vónini verður latin í Ålesund, og fólk frá Vónini fara eisini at hjálpa manningini á Ecofive at rigga hetta framtíðar skip til fiskiskap.

Vónin Novaja

Vónin Novaja rækjutrolið hevur somu góðu botnkontakt, sum Vónin Kodiak hevur — og avrikar, eins og tess fyrigangari, væl á bleytum havbotni.

Vónin Storm

Tá Vónin fór undir at kanna marknaðin fyri trolhurðar, byrjaðu sniðgevararnir hjá felagnum við einum lista yvir øll krøv til eitt nýtt trolhurðadesign. Lemmarnir skuldi uppfylla tørvin hjá botntrolarum, ið royna á torførum fiskileiðum við grýtunum botnlendi og í økjum, har havísur kann vera ein gerandis avbjóðing.